Lajmet e Fundit

SHBA PASHTRON NGUSHTICËN E HORMUZIT NGA MINAT/ Trump paralajmëron Iranin për “tolerancë zero”

Presidenti amerikan Donald Trump ka deklaruar se Marina e Shteteve të Bashkuara ka përfunduar operacionin për pastrimin e ujërave ndërkombëtare të Ngushticës së Hormuzit nga minat detare. Sipas tij, të gjitha minat e identifikuara në këtë zonë janë larguar ose janë shkatërruar, duke i hapur rrugë përpjekjeve për garantimin e lundrimit në një prej korridoreve më të rëndësishme detare në botë. Trump e bëri deklaratën përmes një postimi në rrjetin social Truth Social, ku tha se ishte informuar nga Marina amerikane për përfundimin e operacionit të çminimit. Presidenti amerikan paralajmëroi gjithashtu Iranin se çdo përpjekje për vendosjen e minave të reja në zonë do të përballet me një reagim të menjëhershëm dhe të ashpër. Sipas Trump, politika e Shteteve të Bashkuara ndaj çdo aktiviteti që mund të rrezikojë lundrimin në Hormuz është tashmë e bazuar në “tolerancë zero”. Ai tha se SHBA-ja po përdor edhe kapacitetet e saj hapësinore për të monitoruar situatën dhe për të identifikuar çdo kërcënim të mundshëm në këtë rrugë ujore. Ngushtica e Hormuzit ka një rëndësi të jashtëzakonshme për ekonominë botërore, pasi përmes saj kalojnë sasi të mëdha të naftës dhe gazit të destinuara për tregjet ndërkombëtare. Çdo kufizim apo ndërprerje e lundrimit në këtë zonë mund të shkaktojë pasoja të drejtpërdrejta në furnizimin global me energji dhe në çmimet e naftës. Megjithatë, deklarata amerikane për përfundimin e çminimit nuk nënkupton domosdoshmërisht eliminimin e çdo rreziku. Një vlerësim i Joint Maritime Information Center ka paralajmëruar për mundësinë e ekzistencës së minave të zhvendosura ose të paregjistruara, ndërsa operacionet e kontrollit dhe monitorimit të zonës vijojnë. Situata mbetet veçanërisht e ndjeshme për shkak të tensioneve të larta mes Washingtonit dhe Teheranit. Në të njëjtën kohë, Irani dhe Omani po diskutojnë krijimin e një korridori të përkohshëm që do të mundësonte lundrimin më të sigurt përmes Ngushticës së Hormuzit. Deklaratat e Trump vijnë gjithashtu pas një serie qëndrimesh të forta amerikane lidhur me kontrollin dhe sigurinë e kësaj rruge strategjike. Ngushtica është kthyer në një pikë kyçe të përplasjes mes SHBA-së dhe Iranit, ndërsa siguria e saj mbetet me rëndësi jo vetëm për vendet e rajonit, por edhe për tregjet globale të energjisë.

DAJTI PËRFSHIHET NGA FLAKËT/ Sipërfaqe e madhe pyjore digjet, ndërhyrja vijon edhe nga ajri

Vendi

DAJTI PËRFSHIHET NGA FLAKËT/ Sipërfaqe e madhe pyjore digjet, ndërhyrja vijon edhe nga ajri

Një zjarr i fuqishëm ka përfshirë një sipërfaqe të konsiderueshme pyjore në malin e Dajtit, në Tiranë, duke rikthyer shqetësimin për përhapjen e flakëve në zonat me bimësi të dendur. Zjarri është shfaqur në një terren pyjor, ku ndërhyrja paraqitet e vështirë për shkak të karakteristikave të zonës dhe shtrirjes së vatrës. Flakët kanë përfshirë një hapësirë të gjerë dhe po punohet për kufizimin e tyre, me qëllim shmangien e përhapjes së mëtejshme në pjesë të tjera të masivit pyjor. Për situatën janë angazhuar ekipet në terren, ndërsa operacioni është mbështetur edhe nga ajri. Një avion zjarrfikës po ndërhyn mbi zonën e përfshirë nga zjarri, duke hedhur ujë në vatrat aktive dhe duke ndihmuar në përpjekjet për vënien e situatës nën kontroll. Ndërhyrja ajrore po zhvillohet paralelisht me punën e forcave në terren. Autoritetet po vijojnë monitorimin e zonës për të identifikuar vatrat aktive dhe për të parandaluar përhapjen e flakëve drejt sipërfaqeve të tjera pyjore. Deri në këtë fazë nuk raportohet për persona të lënduar apo dëme në banesa. Ndërkohë, mbetet për t’u përcaktuar shkaku i rënies së zjarrit dhe sipërfaqja e saktë e përfshirë nga flakët. Operacioni do të vijojë deri në neutralizimin e plotë të vatrave dhe garantimin e situatës së sigurt në zonë.

Avdylaj vendos në fund, SHQIPËRIA U-16 fiton ndaj Malit të Zi

Sport

Avdylaj vendos në fund, SHQIPËRIA U-16 fiton ndaj Malit të Zi

Kombëtarja shqiptare U-16 e ka nisur me fitore serinë e dy ndeshjeve miqësore ndaj Malit të Zi. Kuqezinjtë triumfuan 1-0 në stadiumin “Loro Boriçi”, në një përballje që u vendos vetëm 10 minuta para përfundimit. Pjesa e parë u mbyll pa gola, me Shqipërinë që krijoi disa mundësi për të zhbllokuar rezultatin, por pa arritur të konkretizojë. Edhe Mali i Zi pati rastet e tij, duke e mbajtur takimin të hapur deri në pushim. Trajneri Armand Dama e nisi ndeshjen me Aliajn në portë, ndërsa në formacionin titullar u aktivizuan Hazizaj, Muharremi, Avdylaj, Elqeni, Taci, Sina, Ramadani, Kopani, Mehmeti dhe Perkola. Në pjesën e dytë, Shqipëria vijoi të kërkonte golin e avantazhit, ndërsa trajneri Dama shfrytëzoi miqësoren për të testuar edhe lojtarët e tjerë të grupit. Disa zëvendësime i dhanë mundësi futbollistëve të ndryshëm të merrnin minuta në fushë. Momenti vendimtar i sfidës erdhi në minutën e 80-të, kur Avdylaj realizoi golin e vetëm të takimit dhe i dha Shqipërisë avantazhin 1-0. Në minutat e fundit, kuqezinjtë administruan rezultatin dhe siguruan fitoren. Shqipëria dhe Mali i Zi do të përballen sërish më 27 gusht, këtë herë në territorin malazez. Ndeshja e dytë miqësore do të nisë në orën 11:00.

E PAZAKONTË NË KOMBINAT/ Indiani arrestohet mbi çatinë e banesës pas tentativës për vjedhje

Vendi

E PAZAKONTË NË KOMBINAT/ Indiani arrestohet mbi çatinë e banesës pas tentativës për vjedhje

Një ngjarje e pazakontë është regjistruar në zonën e Kombinatit në Tiranë, ku policia ka arrestuar në majë të çatisë së një banese një 31-vjeçar nga India, i dyshuar se kishte tentuar të hynte në shtëpi për të vjedhur. Sipas të dhënave të bëra publike, Manpreet Nanak Chand Manpreet kishte ngjitur çatinë e banesës së një shtetasi me inicialet E.P. gjatë orëve të natës, me qëllim që të hynte përmes një dritareje të vogël dhe të merrte sende me vlerë. Prania e tij u vu re fillimisht nga pronari i banesës, i cili rreth orës 23:48 dëgjoi zhurma që vinin nga jashtë. Kur doli për të kontrolluar situatën, ai pa një person mbi çati dhe njoftoi menjëherë policinë. Efektivët e Komisariatit Nr. 6 mbërritën në vendngjarje dhe, pas ndërhyrjes, bënë të mundur zbritjen e 31-vjeçarit nga çatia dhe arrestimin e tij rreth orës 01:10 të 23 gushtit. Më herët, i riu ishte shoqëruar në komisariat pas një konflikti me një qytetar, të cilit dyshohet se i kishte dëmtuar xhamin e automjetit. Për atë ngjarje ai ishte lënë i lirë dhe po hetohej në gjendje të lirë. Një ditë pas arrestimit për tentativën e vjedhjes, 31-vjeçari është paraqitur në Gjykatën e Tiranës. Me kërkesë të prokurorisë, gjykata ka vendosur masën e sigurisë “arrest në burg”, ndërsa ndaj tij është ngritur akuza për “vjedhje të mbetur në tentativë”. Vendimi është argumentuar edhe me rrezikun e largimit të shtetasit të huaj nga Shqipëria. Gjatë seancës, i arrestuari nuk ka pranuar të japë deklarime, duke bërë të ditur se do të flasë në një moment tjetër. Sipas dëshmisë së pronarit të banesës, personi i dyshuar nuk kishte arritur të depërtonte brenda shtëpisë, pasi ishte pikasur para se të realizonte qëllimin e tij. Policia vijon procedurat për dokumentimin e plotë të ngjarjes.

PORTOKALLI/ Ndryshime të mëdha në sezonin e ri, Agron Llakaj rikthehet në drejtimin e spektaklit

Life & Gossip

PORTOKALLI/ Ndryshime të mëdha në sezonin e ri, Agron Llakaj rikthehet në drejtimin e spektaklit

Në nisje të sezonit të ri televiziv, “Portokalli” pritet të sjellë disa ndryshime të rëndësishme në drejtimin dhe përbërjen e spektaklit të humorit. Sipas raportimeve që qarkullojnë në media, Agron Llakaj pritet të rikthehet në “Portokalli” pas më shumë se një dekade. Aktori dhe moderatori i njohur do të ketë një rol të dyfishtë, duke marrë përsipër drejtimin dhe regjinë e spektaklit. Rikthimi i Llakajt në Top Channel pritet të shoqërohet edhe me disa prej emrave të njohur të humorit, duke sjellë një tjetër atmosferë në sezonin e ri. Ndërkohë, Salsano Rrapi nuk do të jetë më pjesë e “Portokalli”, por largimi nga spektakli nuk nënkupton përfundimin e bashkëpunimit të tij me Top Channel. Atij, së bashku me regjisorin Ilir Muhametaj, u është besuar një tjetër projekt televiziv. Ndryshimet pritet të jenë pjesë e risive që Top Channel ka planifikuar për sezonin e ri, ndërsa rikthimi i Agron Llakajt në drejtimin e “Portokallisë” pritet të jetë një nga zhvillimet më të komentuara.

IZRAEL-TURQI/ Tensionet për Sirinë përshkallëzohen, Tel Avivi paralajmëron Ankaranë pas goditjes së bazës ajrore

Bota

IZRAEL-TURQI/ Tensionet për Sirinë përshkallëzohen, Tel Avivi paralajmëron Ankaranë pas goditjes së bazës ajrore

Tensionet mes Izraelit dhe Turqisë po thellohen për shkak të zhvillimeve ushtarake në Siri. Tel Avivi i ka kërkuar Ankarasë të mos zgjerojë praninë e saj ushtarake në territorin sirian, pak ditë pasi ushtria izraelite goditi bazën ajrore Abu al-Duhur në veriperëndim të vendit. Sulmi, i kryer të martën, shkaktoi dëme në bazën ajrore, ndërsa nuk u raportuan viktima. Sipas autoriteteve izraelite, objekti po përgatitej për t’u përdorur nga forcat turke. Ministri izraelit i Mbrojtjes, Israel Katz, akuzoi presidentin turk Rexhep Tajip Erdogan se po e përfshin Turqinë në “aventura të rrezikshme” në Siri dhe paralajmëroi Ankaranë të mos e vërë në provë vendosmërinë e Izraelit për mbrojtjen e sigurisë së tij. Edhe zyra e kryeministrit izraelit Benjamin Netanyahu e lidhi përplasjen me praninë turke në Siri. Sipas saj, Damasku ndodhet përballë ndryshimit të një “status quo-je” të sigurisë për shkak të mundësisë së vendosjes së trupave turke në territorin sirian. Turqia dhe Siria i kanë mohuar këto pretendime. Marrëdhëniet mes Izraelit dhe Turqisë janë përkeqësuar ndërsa Siria është shndërruar në një pikë të re përplasjeje mes dy vendeve. Turqia është ndër mbështetëset kryesore të presidentit sirian Ahmed al-Sharaa dhe po ndihmon në trajnimin dhe rindërtimin e forcave të armatosura siriane. Kjo ka rritur shqetësimin e Izraelit, i cili kundërshton krijimin e një pranie të përhershme ushtarake turke në Siri. Tel Avivi vlerëson se një prani e tillë mund të ndikojë në sigurinë e Izraelit dhe të kufizojë veprimet e ushtrisë së tij në territorin sirian. Përplasja për ndikimin dhe praninë ushtarake në Siri po e kthen kështu vendin në një tjetër vatër tensioni mes Izraelit dhe Turqisë.

DUKATI NË FLAKË/ Mbi 100 efektivë dhe 2 avionë në terren, vihet nën kontroll pjesa më e madhe e zjarrit

Vendi

DUKATI NË FLAKË/ Mbi 100 efektivë dhe 2 avionë në terren, vihet nën kontroll pjesa më e madhe e zjarrit

Operacioni për shuarjen dhe vënien nën kontroll të vatrave të zjarrit në Dukat të Vlorës ka vijuar pa ndërprerje, me angazhimin e Forcave të Armatosura dhe mjeteve ajrore zjarrfikëse. Në terren janë angazhuar 70 efektivë të Forcës Tokësore, 29 efektivë të Komandës Mbështetëse dhe 2 efektivë të Policisë Ushtarake. Në operacion janë përfshirë gjithashtu 2 avionë zjarrfikës, të cilët kanë ndihmuar në përballimin e situatës. Falë ndërhyrjes së forcave në terren dhe mbështetjes nga ajri, pjesa më e madhe e vatrave të zjarrit është shuar dhe situata është vënë nën kontroll. Forcat e angazhuara vijojnë monitorimin e zonës për të parandaluar riaktivizimin e vatrave të mbetura, ndërsa trupat mbeten në gatishmëri për çdo ndërhyrje të nevojshme.

SHAKHTAR DONETSK ZGJEDH “STAMFORD BRIDGE”/ Chelsea nuk do të luajë në Champions këtë sezon

Sport

SHAKHTAR DONETSK ZGJEDH “STAMFORD BRIDGE”/ Chelsea nuk do të luajë në Champions këtë sezon

Shakhtar Donetsk do t’i zhvillojë ndeshjet si skuadër pritëse në Ligën e Kampioneve 2026/27 në stadiumin “Stamford Bridge”, pas marrëveshjes së arritur me Chelsea. Klubi ukrainas ka konfirmuar zyrtarisht impiantin londinez si stadiumin ku do të presë kundërshtarët në kompeticionin europian. Për shkak të luftës në Ukrainë, Shakhtari ka qenë i detyruar t’i zhvillojë ndeshjet në fusha të ndryshme europiane gjatë viteve të fundit, përfshirë Poloninë, Gjermaninë dhe Slloveninë. Për sezonin e ri, skuadra ukrainase do të zhvendoset në Angli dhe do ta përdorë “Stamford Bridge” si shtëpi për përballjet e saj në Champions League. Stadiumi londinez ka një lidhje të veçantë edhe me Ukrainën, pas shitjes së Chelsea nga Roman Abramovich dhe vendimit që të ardhurat e përfituara të shkonin për viktimat e luftës. Chelsea nuk u kualifikua në kompeticionet europiane pas sezonit 2025/26 dhe për këtë arsye ka rënë dakord t’ia vërë stadiumin në dispozicion Shakhtarit për të gjithë sezonin 2026/27. Kështu, Shakhtar Donetsk do të presë kundërshtarët e tij në Champions League në një prej stadiumeve më të njohura të futbollit anglez.

MAX VERSTAPPEN VAZHDON ME RED BULL/ Piloti holandez firmos marrëveshje deri në vitin 2030

Sport

20 gusht 2026

MAX VERSTAPPEN VAZHDON ME RED BULL/ Piloti holandez firmos marrëveshje deri në vitin 2030

Max Verstappen do të vijojë aventurën e tij me Red Bull Racing, pasi piloti holandez ka zgjatur kontratën me skuadrën austriake deri në fund të vitit 2030. Marrëveshja e re i jep fund spekulimeve për një largim të mundshëm të kampionit të Formula 1. Red Bull konfirmoi zyrtarisht rinovimin, duke theksuar rëndësinë e vazhdimit të bashkëpunimit me Verstappen. Piloti holandez është një nga figurat kryesore të suksesit të skuadrës në vitet e fundit dhe pritet të mbetet në qendër të projektit të ekipit për sezonet e ardhshme. Drejtori i Red Bull, Laurent Mekies, e cilësoi marrëveshjen si një lajm të rëndësishëm për ekipin dhe për Formula 1. Sipas tij, marrëdhënia mes Verstappen dhe skuadrës është ndërtuar mbi besimin, sukseset në kampionat dhe objektivat e përbashkëta. Për të shoqëruar njoftimin, Red Bull publikoi edhe një video humoristike. Në të, Mekies duket sikur po përgatit një email për largimin e Verstappen, por piloti shfaqet papritur dhe sqaron se bëhet fjalë për një keqkuptim. Me rinovimin e ri, Verstappen dhe Red Bull do të vazhdojnë së bashku objektivin për të fituar gara dhe tituj të rinj në Formula 1.