Nishani respekton Kushtetuten, dekreton Xhafajn
Presidenti Bujar Nishani nuk e pengoi emërimin e Fatmir Xhafajt në krye të ministrisë së Brendshme. Presidenti i qëndroi besnik Kushtetutës, edhe pse, vlerësimi tij për ministrin e propozuar ishte negativ.
“Në vlerësimin tim kandidatura e ministrit te brendshëm është e papërshtatshme, por Kushtetuta nuk ia jep të drejtë Presidentit të Republikës për të refuzuar një kandidaturë për ministër”, u shpreh Kreu i Shtetit.
Bujar Nishani u tregua i drejtpërdrejtë, kur tha se çfarë do të bënte, nëse do të kishte kompetencë të plotë.
“Në rast se Kushtetuta e vendit do t’ia njihte të drejtën Presidentit, unë do ta refuzoja kandidaturën e ministrit të Brendshëm”, tha ai.
Nishani, i cili nuk mori përsipër të krijojë një krize institucionale, ia kaloi parlamentit përgjegjësinë për të miratuar apo jo dekretimin për emërimin e ministrit të Brendshëm. Për këto dy institucione presidenti ka një porosi publike.
“Prioriteti i parë që duhet të kërkojë Parlamenti nga qeveria dhe Ministria është depolitizimi i policisë për të nisur pastaj luftën e suksesshme ndaj fenomeneve që mund të kërcënojnë procesin zgjedhor”, u shpreh Nishani.
Presidenti u tregua shumë i kujdesshëm për të mos mbajtur anë politike në situatën delikate të krijuar në vend. Këtë e bëri edhe kur u pyet për qëndrimin e tij mbi kërkesën e opozitës për qeverinë teknike.
Një çështje që sipas tij zgjidhet vetëm me dialog mes partive. “Ajo që unë do t’i bëja thirrje të gjithë aktorëve politikë është të gjejnë gjuhën e përbashkët dhe për të mos e kaluar vendin në një situatë krize politike”, theksoi Nishani.
