Berisha: Do rikthejmë çmimin e energjisë aq sa ka qenë para 2013-ës
Sali Berisha bëri premtimin e parë nga Elbasani, pasi deklaroi se ishte i hapur për çdo funksion politik dhe shtetëror në harkun Kushtetues.
Gjatë Foltores me demokratët e qarkut Elbasan, Berisha tha se do të rikthejë çmimin e energjisë që ka qenë para vitit 2013.
Lideri historik i demokratëve renditi edhe disa nga arritjet e qeverisë së tij 8-vjeçare, siç ishte reforma energjetike, vendosjen e rendit, luftën ndaj krimit të organizuar apo dhe thithjen e investimeve të huaja.
"Ne e gjetëm vendin me gjeneratorë, u zotuam dhe i hoqëm gjeneratorët në vitin 2007. Mbajtëm një çmim energjie dhe do ta rikthejmë po aq çmimin. Rendin e vendosëm, 1100 anëtarë të grupeve kriminale dhe bosët e tyre, u arrestuan dhe u burgosën e morën dënimet. Shumëfishuam investimet e huaja, erdhi Statkrafti, kompania numër një në ndërtimin e HEC-ve në botë. Në një rikthim, ju garantoj se mund të bëjmë tre herë më shumë", u shpreh Berisha.
