Meta shpërndan mesazhin e Papa Franceskut:Hipokriti ka frikë se e vërteta del në shesh!
Presidenti i Republikës Ilir Meta ka shpërndarë një lajm, ku Papa Francesku flet përpara një audience, e ku vë në dukje fenomenin e “virusit të hipokrizisë”.
Meta thekson se jetojmë në kohët e “virusit të hipokrizisë”, por kjo gjë duhet të marrë fund. Kreu i Shtetit shprehet ndër të tjera, se nuk është e rrallë që të hasësh në hipokritë në politikë.
Postimi i presidentit Ilir Meta:Në audiencën e sotme të përgjithshme Papa Françesku u ndal tek “virusi i hipokrizisë”.
"Çfarë është hipokrizia? Është frikë përballë së vërtetës. Hipokriti ka frikë se mund të dalë në shesh e vërteta. I pëlqen më shumë të shtiret, sesa të jetë vetvetja. Shpesh hipokrizia fshihet në vendin e punës, ku ndokush përpiqet të shtiret si mik me kolegët, ndërsa nuk synon tjetër gjë, veçse t’i godasë mbas shpine.
Në politikë nuk është gjë e rrallë të takohesh me hipokritë, të cilët jetojnë një jetë të dyfishtë, atë publike e atë private, që ndryshojnë si nata me ditën.
Nuk duhet t’i harrojmë kurrë fjalët e Zotit: ‘FJALA JUAJ LE TË JETË: PO, PO; JO, JO!"
Mesazh kaq aktual edhe për shoqërinë tonë!
