Shqipëria humb 9 vende në lirinë ekonomike, Meta: Shteti i kapur nga oligarkët
Presidenti Ilir Meta shkruan në faqen e tij në Facebook se Shqipëria ka humbur 9 vende në renditjen për lirinë ekonomike, krahasuar me një vit më parë.
Ai ka publikuar një raport të fondacionit prestigjioz ‘Heritage’.
Reagimi i plotë i presidentit Ilir Meta:
Shqipëria, sipas raportit të fondacionit prestigjioz botëror ‘Heritage’, ka rënë nëntë vende më poshtë në renditjen për lirinë ekonomike, krahasuar me një vit më parë.
Kjo rrëshqitje e frikshme në pikiatë e lirisë ekonomike, është pasojë e drejtpërdrejtë e cenimit brutal të të drejtave të pronësisë dhe mosfunksionimit të sistemit gjyqësor.
Ky raport thellësisht negativ konfirmon qëndrimet e vazhdueshme publike, që kam shprehur edhe me dekrete, në mbrojtje të konkurrencës së lirë.
Ndaj është urgjente ç’kapja e shtetit, Kuvendit, Qeverisë dhe e pushtetit gjyqësor nga oligarkët dhe interesat okulte.
Referendumi i 25 prillit është një mundësi historike për të nxjerrë nga ‘intubimi’ edhe lirinë ekonomike, krahas të gjitha lirive të tjera, që gëzojnë qytetarët në një vend plotësisht europian.
