Lidhur me lehtësimin e masave, ai deklaroi se hapja duhet me kujdes. “Duhen parë se cilat do jenë rezultatet për hapjen. Nuk kishim mundësi tjetër, përpos mbylljes. Masat nuk i ka shpikur qeveria, por vetëm i ka aplikuar. Kryeministri është një mjeshtër i komunikimit, ai llogarit çdo fjalë që e thotë. Në një situatë pandemie, të gjithë duhet të ulim armët e të bashkëpunojmë por ne kemi një farë eksperience se si përdoren ngjarje të caktuara për marrëveshje. Mendoj se ka më tepër një kalkulim politik. Kam mbështetur përpjekjet e presidentit për sa kohë kanë qenë në sintoni me interesin publik.
Mendoj që opozita nuk duhet të kompleksohet dhe nuk duhet të shohë shumë këtë fuqi të hipotetizuar në numra por duhet të punojë që të shndërrohet në një fuqi morale që të tërheqë pas vetes fuqinë për të bërë diçka për të ndryshuar këtë realitet të degraduar. Lideri i PD-së Lulzim Basha që muajt e fundit ka bërë një operacion mjaft interesant imazhi, madje po të shohim të gjithë skakierën është sjellë si kryeministër por shumë racional, ka detyrën që në PD të sjellë mendimin elitar.
Opozita është sjellë mjaft mirë. Opozita po e bën pjesën e vet të propozimeve, por nuk ka kuptuar që Edi Rama po sillet si në fushatë elektorale jo sikur është në menaxhimin e një pandemie. Opozita duhet të sillet politikisht. E ka të pamundur që një sjelljeje politike t’i sillet me sjellje të shqetësimit qytetar, politikës duhet t’i përgjigjet me politikë”, deklaroi Gjekmarkaj.

Sa i përket testimit masiv ai tha se është moto e OBSH-së dhe se sa më shumë tamponë e testime aq më e lehtë bëhet përballimi i pandemisë.

“Nuk e di cili është eksperti që këshillon km dhe qeverinë kur OBSH e pranoi që kishte gabuar që kishte hedhur teorinë e testimeve të lokalizuara. Tani ka një moto, testime, testime. Ke rastin e fundit në Krujë apo Kurbin, ku ka vatra të reja. Aty kishte një biznes fason, prej kohësh është thënë që duhet të mbylleshin fasoneritë, që të testoheshin njerëzit.

Në lidhje me ekonominë dhe paketat, ai tha se janë konfuze dhe modeste dhe se duken si paketa sociale për sot.
“Kapacitetet e Shqipërisë sigurisht që janë të kufizuara kështu që në këtë kontekst nuk mund të mendojmë se mund të bien kapakë floriri nga qielli. Paketat më duken konfuze, modeste. Më tepër se paketa ndihme për nesër më duken paketa sociale për sot. Shoh paqartësi. Nuk ka një vizion për turizmin përveç se thirrjeve patriotike rrini në Shqipëri. Nuk ka ende një projekt për plot biznese të tjera. Paketa ekonomike është një paketë sociale për momentin, mjaft e ngatërruar por nuk shoh një paketë të mirëfilltë ekonomike që mund t’i japë shpresë vendit”, u shpreh Gjekmarkaj.

Po a do ndryshojë shoqëria shqiptare pas pandemisë?
“Do ndryshojmë në një fazë të parë psikologjikisht. Do dalim në rrugë e do mendojmë se kemi një armik virtual. Do shtojmë distancat e higjienën, do shmangim tubimet. Do hyjmë me kujdes në një dyqan, në një auditor. Do ecim me kokën anash. Frika është humane”, tha Gjekmarkaj.