'Kushtetuesja', Meta: po shkelet Kushtetuta, kryetari i KED po kryen veprime mafioze
Presidenti Ilir Meta doli në një konferencë për shtyp në mbrëmje, pasi dekretoi Marsida Xhaferllarin si anëtare të Gjykatës Kushtetuese.
“Siç jeni njohur nga zëdhënësi i presidencës, ose sic më pëlqen ta konsideroj Blushi im, kam firmosur dekretin për përzgjedhjen e zonjës Marsida Xhaferllari si gjykatëse e Gjykatës Kushtetuese pas kthimit nga Parisi,” tha Meta.
Kreu i shtetit tha se krijimi i Gjykatës Kushtetuese është një moment historik, ndaj Kushtetuta duhet zbatuar në mënyrë rigoroze.
“Momenti i krijimit të Gjykatës Kushtetuese është historik, sepse për herë të parë krijohet Gjykata Kushtetuese sipas reformës në Kushtetutë për Reformën në Drejtësi. Prandaj është e rëndësishme të respektohet Kushtetuta, sidomos për Gjykatën Kushtetuese. Pra çdo veprim i presidentit aktual mbetet si precedent për presidentët e ardhshëm,” tha Meta.
Ai akuzoi ashpër kreun e Këshillit të Emërimeve në Drejtësi, Ardian Dvorani se ka bërë një lojë mafioze me dërgimin e listave vetë, pavarësisht se KED është një organ kolegjial. Meta e quajti Dvoranin të keqpërdorur dhe ushtar të partisë.
“Kryetari i KED bën lojëra të karakterit administrativ, duke vendosur vetë kohën se si i dërgon listat, në mënyrë të dyshimtë, për të mos thënë mafioze, që të vendosë presidentin në këtë pozitë: që o të shkelë detyrimisht Kushtetutën e Shqipërisë që thotë qartë se ai plotëson vakancën e parë dhe pastaj është radha i Kuvendit, ose me interpretime qesharake dhe absurde thotë se i ka mbaruar afati presidentit, kjo është absurde, e turpshme, mafioze” tha Meta.
I pyetur nga gazetarët nëse janë shkelur afatet prej 30 ditësh, Meta tha se nuk ka asnjë afat të përcaktuar në Kushtetutë për presidentin e Republikës. Meta citoi sërish nenin e Kushtetutës që flet për rendin sipas të cilit zgjidhen anëtarët e Gjykatës Kushtetuese, fillimisht nga presidenti, më pas nga Kuvendi.
“Kushtetuta e thotë qartë se presidenti ka të drejtën e parë për vakancën e parë, pastaj është parlamenti dhe kështu përsëritet e njëjta renditje dhe në këtë aspekt është detyra e KED-së të rregullojë listat e vakancës,” tha Meta.
Sipas tij, “Presidenti i Republikës ka qenë shembull i bashkëpunimit me KED-në”.
