Kuvend, votohen “pakicat” dhe komisionin për reformën zgjedhore
Kuvendi i Shqipërisë ka votuar në orët e vona të së premtes ligjin për mbrojtjen e pakicave kombëtare.
Në përfundim të seancës maratonë, ligji ka kaluar me 102 vota pro, 10 kundër dhe 1 abstenim.
Gjatë votimit nen për nen, kryetari i PBDNJ-së, Vangjel Dule ka propozuar disa amendamente, me pretendimin se ky ligj karakterizohet nga mosnjohja e legjislacionit tonë dhe konventave ndërkombëtare.
“Karakterizohet nga fobi dhe reminishenca të Luftës së Ftohtë. Misioni i këtij ligji nuk përmbushet dhe kemi kthim mbrapa në disa nene”, ka thënë Dule. Por në vijim të votimit amendamentet e tij janë rrëzuar.
Më pas, deputetët e Kuvendit kanë miratuar gjithashtu me 116 vota pro, asnjë kundër dhe asnjë abstenim për ngritjen e komisionit të reformës zgjedhore.
