Vettingu, komisionet nisin punën me seancat dëgjimore
Komisioni i verifikimit te kandidaturave për Vetting-un do të bëjë të hënën dhe të martën e ardhshme seancat dëgjimore me të gjithë aplikantët, me ata që kanë marrë rekomandim pozitiv dhe ata që nuk kanë kaluar testin e Operacionit Ndërkombëtar të Monitorimit, edhe pse i plotësonin kriteret formale.
Këta të fundit janë 17, por gjithsej kandidatë që do të dëgjohen janë 191, ç'ka do të thotë se puna e deputeteve është voluminoze.
Megjithëse ranë dakord për kalendarin e punës në Komision, deputetët patën edhe debate pas kërkesës së opozitës që Avokati i Popullit dhe ONM-ja të jepnin sqarim të detajuar lidhur me vendimet e tyre për kandidatët.
Këtë të enjte nisen nga puna edhe dy komisionet përzgjedhës të Vetting-ut, përkatësisht me nga 12 dhe 6 anëtarë. Ata do të votojnë nëpërmjet një sistemi elektronik për anëtarët që do të bëjnë Vetting-un dhe zëvendësuesit e tyre.
Duke qene se ky sistem është i paprovuar më parë, deputetët do të trajnohen më parë për të votuar në mënyrën e duhur.
