Kek me krem qumështi dhe qershi
Tani që çmimi i qershive është ulur, mund t’i përdorim edhe në ëmbëlsira apo t’i bëjmë reçel. Sot kemi përgatitur këtë kekun e shijshëm të cilit i kemi shtuar edhe pak pana.
Koha e përgatitjes - 20 minuta
Përbërësit për tavë me diametër 24, me vrimë në mes:
●250 g miell
●170 g sheqer
●3 vezë
●250 g pana për ëmbëlsira (nuk do ta rrihni, do ta përdorni lëng)
●lëkura e një limoni organik
●1 bustinë vanilje
●1 bustinë sodë për ëmbëlsira (16 g)
●250 g qershi pa bërthamë
Përgatitja:
Ndezim furrën me 180 gradë.
Në robot (ose me rrahësin elektrik të vezëve), rrahim vezët me sheqerin për 8 minuta derisa të bëhen si shkumë. Shtojmë më pas miellin, vaniljen, sodën, dhe në fund panën. Gjatë gjithë kohës do të përdorim rrahësin elektrik. Hedhim brumin në tavën e lyer me gjalpë dhe miell, vendosim sipër kokrrat e qershive dhe e pjekim për afro 45 minuta, por gjithmonë bëjmë provën me kruajtëse dhëmbësh, pasi jo të gjitha furrat pjekin njëlloj.
