“Lodrat e mia” – Cristiano Ronaldo zbulon koleksionin e tij luksoz dhe marramendës të supermakinave me vlerë miliona euro

Ylli botëror i futbollit, Cristiano Ronaldo, ka tërhequr sërish vëmendjen e miliona ndjekësve në rrjetet sociale, pasi ka ndodhur të publikojë disa fotografi nga garazhi i tij me koleksionin mbresëlënës të supermakinave. Sulmuesi portugez i shoqëroi imazhet në Instagram me përshkrimin e shkurtër: ‘Lodrat e mia’, ndërsa më herët ai ka pranuar se nuk e mban më mend saktësisht numrin e automjeteve që zotëron.

‘Nëse do të duhej të bëja një hamendësim, do të thosha 40 ose 41. Sinqerisht nuk e di. Më pëlqejnë Bugatti-t, janë krejt ndryshe’, është shprehur ai në një intervistë të kaluar për Piers Morgan. Në koleksionin e ekspozuar spikasin disa prej modeleve më ekskluzive në botë, si disa automjete të rralla të markës Ferrari: Purosangue (rreth 312 mijë paund), Ferrari 599 GTO (mbi 500 mijë paund), Ferrari SP3 Daytona (rreth 1.73 milionë paund) dhe Ferrari Monza SP1, një model tejet i rrallë që në ankande ka kapur shifrën e afro 2.27 milionë paundëve.

Gjithashtu, Ronaldo zotëron dy makina Bugatti, një Veyron me vlerë rreth 2 milionë paund dhe një Centodieci ultra-ekskluziv, nga i cili ekzistojnë vetëm 10 njësi në botë dhe është vlerësuar nga RM Sotheby's me rreth 12.5 milionë paund. Mes xhevahireve të tjera në garazhin e sulmuesit të Al-Nassr figurojnë McLaren Speedtail (rreth 2.1 milionë paund), hiper-makina hibride Mercedes-AMG One (mbi 2.2 milionë paund), si dhe një Bugatti Tourbillon me vlerë 3.2 milionë paund të blerë si investim.

Koleksioni i tij përfshin gjithashtu një Mercedes G-Wagon Brabus (600 mijë paund) – dhuratë nga partnerja e tij Georgina Rodriguez, e cila i ka dhuruar edhe një Rolls-Royce Daën (500 mijë paund) që i shtohet dy modeleve të tjera Rolls-Royce që lojtari kishte më parë. Pjesë e flotës janë edhe një Mercedes-Benz S65 AMG, McLaren MP4-12C, Lamborghini Aventador, disa modele Bentley dhe Lamborghini Urus, si dhe një Chevrolet Camaro për përdorim familjar. 41-vjeçari, i cili në vitin 2025 u shpall futbollisti i parë miliarder, po shijon pushimet verore përpara rikthimit në fushë me Al-Nassr, ndërsa raportimet sugjerojnë se ai pritet të kurorëzojë dashurinë në martesë me Georgina Rodriguez në javët e ardhshme.