Kriza thellohet në FIFA – Numri dy i organizatës, Mattias Grafström, distancohet publikisht nga Gianni Infantino pas skandalit të projektit komercial

Presioni ndaj presidentit të FIFA-s, Gianni Infantino, ka arritur nivelekritike, pasi kriza e brendshme e organizatës ka marrë një kthesë të re dramatike. Në një email të drejtuar punonjësve të administratës – i zbuluar këtë të martë nga mediat prestigjioze “Le Monde” dhe “The Athletic” – sekretari i përgjithshëm dhe numri dy i FIFA-s, Mattias Grafström, është distancuar zyrtarisht nga kreu i institucionit. Suedezi ka ofruar garanci për mbrojtjen e stafit, duke lëshuar njëkohësisht kritika të qarta dhe të tërthorta në drejtim të Infantinos.

Në qendër të kësaj stuhie qëndrojnë polemikat rreth projektit të braktisur të njohur si FIFA Forward Enterprise (FFE), i cili parashikonte shitjen e aksioneve dhe të drejtave komerciale të Kupës së Botës. Ky plan, që u rrëzua përfundimisht pas një vale të fuqishme protestash globale në botën e futbollit, ka zhytur organin qeverisës në një kolaps të brendshëm drejtimi. Në mesazhin e tij të gjatë, Grafström e përshkroi situatën si “një javë të jashtëzakonshme, por tepër të vështirë për të gjithë stafin e FIFA-s”, duke shtuar se punonjësit janë gjetur “në një trazirë që është e vështirë për t’u kuptuar dhe pranuar”, arsye kjo pse ai vendosi t'u drejtohej drejtpërdrejt atyre.

Pa e përmendur emrin e Infantinos drejtpërdrejt, numri dy i organizatës lëshoi mesazhe që u interpretuan gjerësisht si një goditje e fortë ndaj presidentit: “Si anëtarë të administratës, ju do të jeni të mbrojtur përballë klimës aktuale politike.” Më tej, ai shtoi se “individët, periudhat e paqëndrueshmërisë dhe ngjarjet e pafat vijnë e shkojnë”, ndërsa planin e kontestuar e quajti “një sërë ngjarjesh të trishtueshme dhe të dënueshme”, duke theksuar se ato nuk duhet të cenojnë suksesin e organizimit të Kupës së Botës 2026.

Ky distancim shënon goditjen e radhës për rrethin e ngushtë të Infantinos, i cili mori detyrën në fund të vitit 2023 duke zëvendësuar Fatma Samoura-n. Largimet dhe përçarjet brenda hierarkisë po shtohen; më parë, ish-numri tre Kevin Lamour u largua duke e quajtur modelin e drejtimit një “projekt të një njeriu të vetëm”, ndërsa së fundmi edhe drejtori i zhvillimit, Arsène Wenger, doli hapur kundër idesë, duke e cilësuar braktisjen e saj si “absolutisht të nevojshme”.