OBSH paralajmëron 'epideminë e obezitetit' në Evropë, nutricionistja Garuci "Shëndeti para estetikës"
Obeziteti po përhapet vrullshëm dhe sipas Organizatës Botërore të Shëndetësisë shumë shpejt do të marrë përmasat e një epidemie në Evropë. Sipas OBSH normat e obezitetit në rajon janë rritur për 138% në pesë dekadat e fundit. Nutricionistja Arlinda Garuci thotë se në Shqipëri obezët që kryejnë konsulta dietike janë në rritje, por mbipesha shihet më shumë si problem estetik sesa shëndetësor.
"Gjinia femërore i drejtohet më së shumti zyrave nutricionale për të mbajtur dietë dhe për të bërè trajtime të ndryshme. Promovoj shëndetin para estetikës. Kërkesa më e lartë është në periudhën e pranverës dhe njerëzit duhet te ndihen mirë me veten. Është gjë e mirë të ndihesh mirë me veten , të kesh besim që patjetër një peshë e mirë ta sjell. Nga ana tjetër mbipesha duhet parë jo si problem estetik, por si parandalim i sëmundjeve që vijnë. Sëmundje kardiovaskulare, diabet i tipit 2, osteoporoza, probleme me kockat"- tha nutricionistja Arlinda Garuci.
Një ushqyerje e shëndetshme me ushqime bio dhe konsumi i 5 vakteve duke marrë të gjitha vlerat ushqimore janë rekomandimet kryesore për parandalimin e obezitetit.
“Kështu që duhet të konsumojmë 5 vakte në ditë, mëngjesin, vaktin e ndërmjetëm të paradites ku fëmijët përshembull mund të marrin me vete diçka të përgatitur nga shtëpia dhe jo të blejnë produkte të konvecionuara të cilët kanë kolorantëadiktivë, kanë kripë, kanë shumë sheqer dhe sigurisht nuk janë të shëndetshme , pastaj dreka, vakti i ndërmjetëm i pasditës i cili shumè mirë mund të zëvëndësohet me një frut të stinës apo me një grusht frutash të thatëapo me alternativa të ndryshme te fèmijët psh një tost me perime të ndryshme mund t’i bënte shumë mirë dhe darka”,- tha ajo.
Mbipesha dhe obeziteti vlerësohet se shkaktojnë më shumë se 1.2 milion vdekje në vit, duke përbërë më shumë se 13 për qind të vdekjeve në rajon, thuhet në raportin e OBSH-së./Burimi "REPORT TV"
