Pse adoleshentet e kane te nevojshem vajin e peshkut
Një studim i fundit i Universitetit të Oksfordit ka zbuluar se adoleshentët që marrin vaj peshku kanë një sjellje më të mirë sesa ata që nuk e konsumojnë. Ky është kërkimi i parë shkencor që tregon qartë se suplementët oralë mund të përmirësojnë sjelljen e të rinjve. Vaji i peshkut përmban omega 3, një acid yndyror që është i rëndësishëm për ndërtimin e lidhjeve mes qelizave të trurit. Janë pikërisht këto lidhje ato që ndikojnë në sjelljen tonë.
Trupi ynë nuk mund ta prodhojë dot vetë omega 3-shin, kështu që duhet ta marrë nga ushqimet. Vaji i peshkut është më i pasuri me omega 3. Ka prova se mungesa e këtij acidi lidhet me sjelljet problematike te të rinjtë. Nivelet e ulta të omega 3 ulin kimikatet e trurit në periudhën kryesore të zhvillimit të tij dhe çojnë në agresivitet.
Marrja e suplementeve të vajit të peshkut ndihmon në trajtimin e sjelljes antisociale dhe problemeve psikiatrike.
Studimi i Universitetit të Oksfordit vëzhgoi 196 adoleshentë. Dieta e tyre përbëhej kryesisht nga patatinat dhe shumë pak fruta e perime. Vaji i peshkut thuajse nuk figuronte fare. Gjatë periudhës së studimit, këtyre adoleshentëve iu dha vaj peshku dhe u pa një përmirësim i sjelljes së tyre.
“Fëmijët dhe të rinjtë duhet ta marrin nga peshku omega 3-shin, por duke qenë se ka shumë që nuk e preferojnë, zgjidhja më e mirë është vaji i peshkut”, thotë eksperti britanik Jonathan Tammam.
