SHBA-ja vlerëson se çdo transferim iranian i raketave balistike në Rusi do të shënonte një përshkallëzim të mprehtë në luftën në Ukrainë.

Deklarata vjen pas raportimeve se të dy vendet kanë thelluar lidhjet javët e fundit me një transferim të tillë të armëve.

Reuters raportoi në gusht se Rusia po priste dërgimin e menjëhershëm të qindra raketave balistike me rreze të afërt Fath-360 nga Irani dhe se dhjetëra personel ushtarak rus po trajnoheshin në Iran për armët e drejtuara nga sateliti për përdorim eventual në luftën në Ukrainë.

Raketat me rreze të shkurtër veprimi i janë dorëzuar Rusisë nga Irani, raportoi të premten Ëall Street Journal, duke cituar një zyrtar të paidentifikuar amerikan.

“Ne kemi paralajmëruar për thellimin e partneritetit të sigurisë midis Rusisë dhe Iranit që nga fillimi i pushtimit rus të Ukrainës dhe jemi të alarmuar nga këto raporte”, ka thënë zëdhënësi i Këshillit të Sigurisë Kombëtare të Shtëpisë së Bardhë, Sean Savett.

“Çdo transferim i raketave balistike iraniane në Rusi do të përfaqësonte një përshkallëzim dramatik në mbështetjen e Iranit për luftën e agresionit të Rusisë kundër Ukrainës”, ka shtuar ai.

Një zyrtar tjetër amerikan i ka thënë Reuters se ata po vëzhgonin nga afër transferimet e mundshme të raketave iraniano-ruse.

Lëvizjet e mundshme vijnë pasi Shtetet e Bashkuara dhe partnerët, përfshirë Evropën, paralajmëruan se një hap i tillë nga Irani mund të ketë pasoja. Vendet perëndimore kanë parë me shqetësim në rritje lidhjet e thelluara të Iranit dhe Rusisë në muajt e fundit.

Misioni i Iranit në Kombet e Bashkuara në Nju Jork ka thënë të premten se qëndrimi i Teheranit për konfliktin në Ukrainë ishte i pandryshuar.

“Irani e konsideron ofrimin e ndihmës ushtarake për palët e përfshira në konflikt, që çon në rritjen e viktimave njerëzore, shkatërrimin e infrastrukturës dhe një distancim nga negociatat e armëpushimit – të jetë çnjerëzore. Kështu, jo vetëm që Irani abstenon nga përfshirja në veprime të tilla, por gjithashtu u bën thirrje vendeve të tjera që të ndërpresin furnizimin me armë për palët e përfshira në konflikt”, thuhet në një deklaratë të misionit.