Forcat nigeriane kërkojnë persona të armatosur që vranë 50 në kishë
Owo, Nigeri - Personat e armatosur që vranë të paktën 50 njerëz në një kishë katolike në Nigerire hapën zjarr ndaj besimtarëve brenda dhe jashtë ndërtesës në një sulm të koordinuar përpara se të largoheshin nga vend i krimit, thanë autoritetet dhe dëshmitarët të hënën.
Megjithëse forcat nigeriane të sigurisë nuk e kanë identifikuar ende se kush kreu sulmin e së dielës në kishën e Shën Françeskut në qytetin Owo në shtetin relativisht paqësor Ondo, analistët sugjeruan se ata vinin nga gjetkë në vendin e Afrikës Perëndimore, i cili është i rrënuar nga dhuna e grupeve të ndryshme të armatosura, rrëmbyesve dhe ekstremistëve.
Askush nuk ka marrë përgjegjësinë për vrasjet në kishë, në të cilat kishte fëmijë mes të vdekurve dhe ku personat e armatosur shpërthyen një lloj eksplozivi, sipas dëshmitarëve. Një ligjvënës shtetëror nga rajoni tha se numri i të vdekurve ishte të paktën 50 dhe dhjetëra njerëz u plagosën, megjithëse një numër i saktë nuk u publikua nga punonjësit e mbingarkuar të spitalit.
"Sulmi është padyshim në natyrë terroriste dhe shkalla dhe brutaliteti sugjerojnë se ai ishte planifikuar me kujdes, nuk qe i rastit," tha Eric Humphery-Smith, analist i lartë Afrikan në kompaninë e inteligjencës së rrezikut Verisk Maplecroft.
Komisioneri i Policisë së Shtetit Oyeyemi Oyediran tha se forcat e sigurisë, përfshirë ushtrinë, i ndoqën sulmuesit, "por për fat të keq, ne nuk mundëm t'i kapnim ata".
Nënkryetari Yemi Osinbajo dhe zyrtarë të tjerë qeveritarë vizituan kishën të hënën. Një ditë më parë, ai u zotua se "ne do të vazhdojmë të qëndrojmë kundër së keqes dhe Nigeria do të fitojë".
Nigeria, e cila është vendi më i populluar i Afrikës me 206 milionë banorë, është përballur për më shumë se një dekadë me një kryengritje në verilindje nga rebelët ekstremistë islamikë të Boko Haram dhe dega e saj, Provinca e Afrikës Perëndimore të Shtetit Islamik. Ekstremistët, të cilët kanë vrarë më shumë se 35,000 njerëz nga një numërim i OKB-së, po luftojnë për të vendosur ligjin e Sheriatit dhe për të ndaluar arsimin perëndimor.
Megjithatë, Ondo është konsideruar prej kohësh një nga shtetet më të sigurta në vend.
