Biden thërret aleatët në takim për Ukrainën ndërkohë që konflikti po përshkallëzohet në lindje
Presidenti i SHBA Joe Biden do të mbledhë një takim të aleatëve për të diskutuar konfliktin në Ukrainë të martën, tha Shtëpia e Bardhë, pasi Kievi njoftoi se Rusia kishte nisur një ofensivë të re të madhe në lindje të vendit.
Takimi, i njoftuar brenda axhendës së Biden, "është pjesë e koordinimit tonë të rregullt me aleatët dhe partnerët në mbështetje të Ukrainës", tha një zyrtar për AFP, pa përmendur se kush do të përfshihej në atë video-telefonatë.
Ai gjithashtu do të trajtojë "përpjekjet për ta mbajtur Rusinë përgjegjëse", tha Shtëpia e Bardhë.
Takimi vjen pasi presidenti ukrainas Volodymyr Zelensky tha se Rusia, e cila i pushtoi më 24 shkurt, kishte nisur një ofensivë në shkallë të gjerë në rajonin lindor të Donbasit, një lëvizje e parashikuar nga Kievi për javë të tëra.
Luftimet janë intensifikuar në Ukrainën lindore pasi Rusia tërhoqi trupat nga rajoni rreth kryeqytetit Kiev dhe rifokusoi përpjekjet e saj në Donbas, të cilin separatistët pro-Moskë e kanë kontrolluar pjesërisht që nga viti 2014.
Shtetet e Bashkuara dhe aleatët perëndimorë kanë bërë presion mbi Moskën përmes sanksioneve, ndërkohë që mbështesin Ukrainën përmes ndihmave ushtarake dhe të tjera.
I pyetur të hënën nëse masat e reja do të shpallen së shpejti, zëdhënësi i Departamentit të Shtetit të SHBA, Ned Price tha se Uashingtoni do të "vazhdojë të përshkallëzojë sanksionet tona financiare dhe masat e tjera ekonomike kundër Federatës Ruse derisa Moska të heqë dorë në fushatën e saj kundër Ukrainës".
"Ne nuk e kemi parë ende të ndodhë ndaj ne do të vazhdojmë të rrisim kostot."
Ministrat e Mbrojtjes të Turqisë, Britanisë dhe Italisë do të diskutojnë për Ukrainën në Stamboll
Ministrat e Mbrojtjes të Turqisë, Britanisë dhe Italisë do të takohen të premten në Stamboll për të diskutuar pushtimin rus të Ukrainës dhe lidhjet e sigurisë midis tre aleatëve të NATO-s, tha Ministria turke e Mbrojtjes.
Sekretari britanik i Mbrojtjes Ben Ëallace dhe ministri italian i Mbrojtjes Lorenzo Guerini do të vizitojnë Stambollin me ftesë të homologut të tyre turk Hulusi Akar.
“Në takimin ku do të bëhet një shkëmbim mendimesh për marrëdhëniet e mbrojtjes dhe sigurisë mes vendeve dhe për çështjet rajonale, pritet të diskutohen edhe zhvillimet në Ukrainë”, thuhet në deklaratë.
Anëtari i NATO-s, Turqia ndan një kufi detar me Ukrainën dhe Rusinë në Detin e Zi, ka lidhje të mira me të dyja dhe ka marrë një rol ndërmjetësues në konflikt. Ajo ka mbajtur deri më tani bisedimet e paqes midis ministrave të jashtëm dhe negociatorëve të Ukrainës dhe Rusisë, dhe ka punuar për të organizuar një takim të presidentëve të tyre.
Turqia dhe Italia kanë rritur gjithashtu angazhimin që nga samiti i NATO-s muajin e kaluar, ku krerët e Turqisë, Italisë dhe Francës diskutuan mënyrat për të ringjallur projektin e sistemit të mbrojtjes ajrore SAMP-T nga konsorciumi franko-italian Eurosam.
Zelanda e Re vendos sanksione të reja ndaj bankave ruse
Zelanda e Re zbuloi sanksionet e reja të martën që synojnë bankat dhe institucionet financiare më të mëdha të Rusisë, në reagimin e saj ndaj pushtimit të Ukrainës.
"Ne jemi thellësisht të shqetësuar për raportet e brutalitetit nga forcat ruse," tha Ministrja e Jashtme Nanaia Mahuta në një deklaratë pas shpalljes së masave.
“Zelanda e Re vazhdon të dënojë luftën e Putinit dhe mbështet hetimet e Gjykatës Ndërkombëtare Penale për mizoritë e kryera kundër qytetarëve të Ukrainës”.
