Liderët perëndimorë të bashkuar për Ukrainën, tre samite sot në Bruksel
Presidenti i SHBA Joe Biden do të bashkohet me liderët e tjerë perëndimorë në Bruksel të enjten në tre samite mbi luftën e Rusisë në Ukrainë, një muaj pas fillimit të pushtimit.
NATO, G7 dhe BE të gjithë po mbajnë takime, në një shfaqje uniteti që rrallë shihet nga Perëndimi, njofton BBC.
Zoti Biden do të marrë pjesë në të tri, vizita e parë që është bërë ndonjëherë nga një president amerikan në një samit të BE-së në Bruksel.
Por vizita e tij në Bruksel nuk ka të bëjë vetëm me simbolikën.
Pushtimi i Ukrainës nga Rusia i ka dhënë aleancës mbrojtëse perëndimore, NATO-s, një sens të ripërtërirë të qëllimit. Dhe ndërsa BE-ja përpiqet të ndërpresë lidhjet energjetike me Rusinë, ajo duhet të krijojë dhe përforcojë marrëdhënie të tjera, veçanërisht me SHBA-në.
Presidenti ukrainas, Volodymyr Zelensky, do të shfaqet në një lidhje me video me liderët e NATO-s dhe të BE-së.
30 presidentët dhe kryeministrat e NATO-s do të bien dakord për një mbështetje më të madhe për Ukrainën dhe për vendosjen e trupave të reja tek aleatët lindorë. Synimi i tyre është të tregojnë solidaritet me Kievin, edhe pse deri në një pike të caktuar.
Shumë, por jo të gjithë, kanë qenë të gatshëm ta furnizojnë armë. Mbretëria e Bashkuar tha se do të përdorte takimet e G7 dhe NATO-s për të "rritur në mënyrë thelbësore ndihmën vdekjeprurëse mbrojtëse për Ukrainën".
Por aleanca gjithashtu e ka bërë të qartë se nuk do të përfshihet më drejtpërdrejt dhe kërkesat e përsëritura të Zelenskit për një zonë të ndaluar fluturimi mbi Ukrainë janë shpërfillur pothuajse.
Nuk është as e qartë se si do të përgjigjej NATO nëse Rusia do të përshkallëzonte në mënyrë dramatike konfliktin në Ukrainë – si psh, ndonjë sulm ndaj një autokolone armësh perëndimore, në rast përdorimi të armëve kimike apo edhe taktike bërthamore. Vijat e kuqe të NATO-s deri më tani janë rhequr deri në kufijtë e saj.
