Pfizer / BioNTech: Vaksina jonë 100% efektive edhe tek fëmijët 12 - 15 vjeç!
Rezultatet e provave klinike të vaksinës Covid të Pfizer/BioNTech treguan se efikasiteti i saj është 100% dhe u pranua mirë edhe nga fëmijët e moshës 12 deri në 15 vjeç, thanë të dyja kompanitë të mërkurën.
Pfizer/BioNTech planifikojnë të paraqesin të dhënat tek Administrata e Barnave dhe Ushqimit në SHBA sa më shpejt të jetë e mundur për të marrë autorizimin për përdorim të zgjeruar emergjent të vaksinës me dy doza.
Në fazën e tretë të provës me 2,260 pjesëmarrës të moshave 12 deri në 15 vjeç në SHBA, vaksina shkaktoi përgjigje të forta të antitrupave një muaj pas dozës së dytë – duke tejkaluar ato të demonstruara tek njerëzit e moshës 16 deri në 25 vjeç në provat e mëparshme, raportoi Pfizer.
Vaksina aktualisht është e autorizuar në SHBA për përdorim emergjent tek njerëzit mbi 16 vjeç.
Studiuesit gjetën 18 raste me Covid-19 midis 1,129 pjesëmarrësve të cilëve iu dha placebo dhe asnjë rast tek 1,131 vullnetarët që bënë vaksinën. Të dhënat ende nuk janë rishikuar nga afër
Pfizer/BioNTech shtuan se efektet anësore të konstatuara tek adoleshentët ishin të ngjashme me ato që shiheshin në mesin e moshës 16 deri në 25 vjeç. Efektet anësore të zakonshme përfshijnë dhimbje në vendin e injektimit, lodhje dhe temperaturë.
Pjesëmarrësit do të monitorohen për mbrojtje dhe siguri për dy vjet pas dozës së tyre të dytë.
Këto krahasime me popullsinë më të madhe në moshë janë të rëndësishme, sepse studiuesit po mledhin njohuritë që fituan në eksperimentet e të rriturve.
Studiuesit mund të përcaktojnë një numër antitrupash që janë një korrelacion i mbrojtjes së parë tek të rriturit, dhe më pas të kërkojnë atë nivel të antitrupave tek pjesëmarrësit më të rinj për të ditur që vaksina po ofron mbrojtje.
Kjo është arsyeja pse provat e vaksinave Covid-19 tek fëmijët dhe adoleshentët kanë kërkuar në përgjithësi më pak vullnetarë sesa tek testet e të rriturve.
"Ne ndajmë nevojën urgjente për të zgjeruar autorizimin e vaksinës sonë për përdorim në popullata me moshë më të re dhe inkurajohemi nga të dhënat e provave klinike tek adoleshentët midis moshave 12 dhe 15," tha Shefi Ekzekutiv i Pfizer, Albert Bourla.
"Ne kemi në plan t'i paraqesim këto të dhëna në FDA si një ndryshim të propozuar për Autorizimin tonë të Përdorimit me Emergjencë në javët e ardhshme dhe të rregullatorëve të tjerë në botë, me shpresën për të filluar vaksinimin e kësaj grupmoshe para fillimit të vitit të ardhshëm shkollor."
Dr. Ëilliam Gruber, Zv.President Pfizer për hulumtimit dhe zhvillimit klinik të vaksinave gjithashtu vuri në dukje javën e kaluar se vaksina mund të jetë gati për këtë grupmoshë deri në vitin e ardhshëm shkollor.
Kthimi në klasë nuk është faktori i vetëm në lojë. Ekspertët e shëndetit kanë theksuar rëndësinë e mbrojtjes së sa më shumë njerëzve përmes vaksinimit, pasi variantet më infektive Covid-19 vazhdojnë të përhapen në të gjithë kombin.
"Ne të gjithë dëshirojmë një jetë normale. Kjo është veçanërisht e vërtetë për fëmijët tanë," tha Shefi Ekzekutiv i BioNTech, Ugur Sahin.
"Rezultatet fillestare që kemi parë në studimet për adoleshentët sugjerojnë që fëmijët janë veçanërisht të mbrojtur mirë nga vaksinimi, gjë që është shumë inkurajuese duke pasur parasysh tendencat që kemi parë javët e fundit në lidhje me përhapjen e variantit B.1.1.7 në Mbretërinë e Bashkuar."
Kohët e fundit Pfizer i tha CNN se siguria e demonstruar në këtë eksperiment për adoleshentët e ndihmoi kompaninë të merrte vendimin për të filluar testimin e vaksinës së saj tek fëmijët më të vegjël.
Një studim i ndarë në 3 faza i vaksinës së Pfizer/BioNTech tek fëmijët e moshës 6 muajsh deri në 11 vjeç filloi javën e kaluar, kur fëmijët e parë të moshës 5 deri 11 vjeç morën një dozë.
Pfizer/BioNTech planifikon të fillojë dozimin e fëmijëve 2 deri në 5 vjeç javën e ardhshme dhe të shkojë deri te pjesëmarrësit e moshave nga 6 muajsh deri në 2 vjeç.
Kompania synon të regjistrojë 4,644 fëmijë në eksperiment dhe pret rezultate deri në fund të vitit 2021.
