Një anije turke u nis të hënën për të kryer studime sizmike në detin Mesdhe, duke e bërë Greqinë të kërkojë me zemërim nga Bashkimi Evropian sanksione kundër Ankarasë, në vijim të mosmarrëveshjeve mbi të drejtat e eksplorimit në det të hapur.

Franca shprehu shqetësimin e saj pas njoftimit se anija turke, Oruc Reis, kishte filluar udhëtimin. Ajo tha se Turqia duhet t’i përmbahet premtimeve të bëra, të përmbahet nga veprimet provokuese dhe të tregojë mirëbesim.

Ministria e jashtme e Greqisë e quajti nisjen e anijes një “përshkallëzim të madh” dhe “kërcënim të drejtpërdrejtë për paqen në rajon”.

Ndërkohë, Turqia akuzoi Athinën për nxitjen e tensioneve.

Anija Oruc Reis synon të kryejë punime në jug të ishullit grek Kastellorizo, i cili është afër bregdetit të Turqisë.

Ankaraja e kishte tërhequr anijen nga ujërat e diskutueshme të Mesdheut lindor muajin e kaluar për të “lejuar diplomacinë” përpara një takimi të nivelit të lartë të BE-së në të cilin Qiproja kërkoi sanksione kundër Turqisë.

“Turqia ka provuar se i mungon besueshmëria. Të gjithë ata që besuan se Turqia i kishte seriozisht premtimet para samitit evropian të 1 dhe 2 tetorit tani e kanë ndryshuar qëndrimin,” tha zëdhënësi i qeverisë greke Stelios Petsas të hënën.

Në samit, BE-ja tha se do ta ndëshkonte Turqinë nëse vazhdonte operacionet në rajon dhe se sanksionet mund të imponoheshin qysh në dhjetor.

Ministria e Jashtme e Turqisë tha se Athina nuk kishte të drejtë t’i kundërshtonte operacionet e saj, të cilat ishin 15 km nga Turqia dhe 425 km nga territori kontinental i Greqisë.

Ministri i Mbrojtjes Hulusi Akar tha gjithashtu se operacionet e Ankarasë ishin brenda shelfit të saj kontinental dhe priste që Greqia të përmbahej nga hapat që përshkallëzojnë tensionet.