Kompania izraelite që qëndron pas softuerit të diskutueshëm Pegasus është shtuar në listën e zezë tregtare të SHBA-së. Pegasus thuhet se është përdorur nga shtete të caktuara për të kontrolluar telefonat e aktivistëve të të drejtave të njeriut dhe gazetarëve, njofton Radio Evropa e Lirë.

Situata e koronës në Gjermani po bëhet shqetësuese, qeveria planifikon të rrisë presionin ndaj të pavaksinuarve, njofton Deutsche Welle. Kancelarja Merkel, në një takim me kryesinë e Unionit Kristiandemokrat,CDU,është shprehur në favor të kufizimeve të përgjithshme për të pavaksinuarit, por kundër një lockdown-i të përgjithshëm.

Presidenti amerikan Joe Biden ka kritikuar liderët e Kinës dhe Rusisë për mospjesëmarrjen në samitin e klimës COP26. Në një fjalim të martën mbrëma, Biden tha se klima ishte "një çështje gjigante" dhe Kina "iku tutjea" - duke shtuar "e njëjta gjë edhe me Rusinë dhe Putinin".

Liderët botërorë përfshirë Joe Biden, Boris Johnson, Angela Merkel dhe Justin Trudeau patën një darkë diplomatike mbrëmjen e së hënës në atë që u cilësua si mbledhja më e madhe e përfaqësuesve qeveritarë që nga krijimi i Organizatës së Kombeve të Bashkuara.