“Nuk ka vend për takticizma. Aty ku ka dyshime të konsultohemi me OPDAT dhe Euralius”

Kontestimi – “Mund t’iu them se ekziston që në fillim në mendjen time vetëm një plan, për miratimin e reformës dhe për miratimin e saj sipas standardeve të Komisionit të Venecias”, deklaroi dje kryeparlamentari Meta

Rama – “Ne synojmë të miratojmë reformën me konsensus. Ky është plani A. Nëse kjo dështon, atëherë kalojmë në planin B. Ajo palë politike që identifikohet si bllokuese do të ketë një rezultat shumë negativ në zgjedhje”

Opsioni – “Nuk duhet të humbasim kohë. Duhet të ndërtojmë një kalendar konkret duke filluar, mendoj me çështjet më të thjeshta, pra me ato që na bashkojnë.. besoj se përsëri ne kemi asistencën e EURALIUS dhe të OPDAT-it

Raporti final i “Venecias” për reformën në drejtësi ka ndarë qëndrimet e dy aleatëve kryesorë të koalicionit sa i përket çështjes së miratimit të paketës kushtetuese në Kuvend. Nëse Kryeministri Edi Rama flet për një “plan B” në rast të refuzimit të konsensusit me opozitën, kryeparlamentari Ilir Meta e hedh poshtë këtë qëndrim të aleatit të tij, duke theksuar se duhet të lihen mënjanë aludimet dhe takticizmat e këtij lloji. “Mund t’iu them se ekziston që në fillim në mendjen time vetëm një plan, për miratimin e reformës dhe për miratimin e saj sipas standardeve të Komisionit të Venecias. Plane të tjera çdo forcë politike mund të ketë, por unë mendoj që të gjitha energjitë pozitive duhet t’i përqendrojmë te ky plan. Nuk është koha për t’u zhvendosur nga përpjekja për ta materializuar këtë reformë, sepse është bërë një punë e madhe, është bërë punë shumë e madhe. Ka përpjekje për të krijuar tensionime të panevojshme me çështje të cilat nuk janë përparësia kryesore e vendit, por unë besoj te përgjegjësia e të gjithë aktorëve politikë, tani të përqendrohemi këtu”, theksoi Meta në konferencën për shtyp. Kështu LSI-ja, ka të qartë qëndrimin e saj ku reforma nuk mund të realizohet pa opozitën, ku lideri i saj, Meta thekson se duhet të mblidhet sa më parë dhe komisioni i posaçëm parlamentar. Nëse palët kanë mosbesim, kryeparlamentari ka hedhur në tregun politik një tjetër ide, atë të konsultimit me organizmat e tjera ndërkombëtarë, siç janë Euralius dhe OPDAT, BE dhe SHBA, të cilat po asistojnë për procesin e reformës në drejtësi. “E theksova edhe më parë, aty ku mund të ketë lexime apo kuptime të ndryshme për çështje të caktuara, ne përsëri kemi misionin e EURALIUS, kemi misionin OPDAT-it dhe së bashku me ta mund të bëjmë një lexim më objektiv të çdo opinioni për çështje të caktuara të Komisionit të Venecias. Në rast se dëshirojmë të krijojmë pretekste, të krijojmë alibi, të merremi me takticizma nga më të ndryshmet, kjo gjë padyshim që asnjëherë nuk na bashkon dhe nuk na çon drejt konsensusit. Por unë dua të besoj në vendosmërinë e të gjithëve për ta çuar përpara këtë reformë në interesin e vendit”, theksoi Meta. Për kryeparlamentarin nuk ka vend për dyshime, pasi për shumicën e çështjeve beson se të gjithë palët kanë rënë dakord. “Unë besoj se kjo do të fillojë, pasi dihet që edhe opinioni ka ardhur vetëm ditët e fundit dhe tani ky është një opinion përfundimtar, pavarësisht se do të ketë një seancë zyrtare, por seanca bazohet te ky opinion. Pra gjithçka është e qartë. Nuk duhet të humbasim kohë. Duhet të ndërtojmë një kalendar konkret duke filluar mendoj me çështjet më të thjeshta, pra me ato që na bashkojnë, sepse një pjesë shumë të madhe të draftit është e pakontestuar. Çështjet të cilat kanë qenë të debatuara, tashmë kanë një opinion nga Komisioni i Venecias. Mendoj se për shumicën e çështjeve ekziston një lexim i qartë. Për ato çështje që mund të ekzistojë një lexim apo interpretim i ndryshëm, besoj se përsëri ne kemi asistencën e EURALIUS, kemi përsëri asistencën e OPDAT-it, si dy misione të pavarura dhe me eksperiencë të rëndësishme ndërkombëtare në mënyrë që të bëjmë një lexim të përbashkët për çdo çështje, dhe të ecim me një draft konsensual për ndryshimet kushtetuese. Mendoj se procesi është shumë i thjeshtë”, theksoi Meta. Dy ditë më parë, Kryeministri Edi Rama në një emision televiziv, duke komentuar draftin e Venecias për reformën në drejtësi, Rama tha se “ajo palë politike që identifikohet si bllokuese e reformës do të ketë një rezultat shumë negativ në zgjedhjet e ardhshme. Më tej, Kryeministri Rama tha se po synohet që reforma të miratohet duke gjetur konsensusin e opozitës. I pyetur për hapat që do të ndiqen nëse nuk gjendet konsensusi me opozitën, Rama tha se nuk do ta bëjë këtë parashikim, por gjithsesi pranoi se ka një “plan B”, të cilin nuk deshi ta sqarojë. “Ne synojmë të miratojmë reformën me konsensus. Ky është ‘Plani A’. Nëse kjo dështon, atëherë kalojmë në ‘planin B’”, tha Rama.