Ballkani nën masa ajrore të paqendrueshme, priten shira dhe stuhi
Gadishulli i Ballkanit po ndikohet nga masa ajri të paqëndrueshme në shtresat e larta të atmosfrës duke ndikuar vendin tonë në fillimin e javës me rreshje shiu dhe stuhi lokale në zonat malore.
Shërbimi Meteorologjik Ushtarak i Shqipërisë bën të ditur se moti për ditën e sotme parashikohet i kthjellët si dhe alternime vranësirash kalimtare.
Nga orët e mesditës deri ato të pasdites dhe kryesisht në relievet malore në lindje parashikohen vranësirat deri të dendura.
Duke filluar nga orët e mesditës deri ato të pasdites në relievet kodrinore – malore në lindje të territorit, do të ketë reshje shiu të herëpashershme me intensitet të ulët deri mesatar në formën e shtrëngatave.
Në malësitë e qarqeve Shkodër, Kukës, Dibër, Elbasan dhe Korçë parashikohen reshjet hera-herës të rrëmbyeshme dhe intensitet deri të lartë në formën e rrebesheve dhe stuhive shoqëruar me shkarkesa elektrike dhe breshër.
Përreth këtyre zonave reshjet e shiut me intensitet të ulët. Mjegullinë lokale në orët e mëngjesit përgjatë zonave luginore si dhe në zonat malore në momentin e reshjeve të shiut.
Era do të fryjë me drejtim verilindje – veriperëndim 1-5 m/sek. Përgjatë vijës bregdetare dhe zonat luginore era do të jetë me shpejtësi deri në 6-8m/sek. Deti parashikohet i forcës 1-2 balle./ Sipas ATSH
