Variant i ri i koronavirusit, epidemiologu shqiptar: "Prek edhe stomakun"
Një variant i ri i koronavirusit ka dalë në horizont, ndërsa pritet që ai të qarkullojë edhe në vendin tonë. Epidemiologu Artan Simaku është shprehur se varianti BA2 është një nënvariant i Omicronit, që po qarkullon pothuajse në të gjitha vendet e Evropës.
“Është i ngjashëm me Omicronin, por ka një transmetueshmëri më të lartë”.
Përveç transmetueshmërisë më të lartë, nënvarianti BA2, në dallim me mutacionin Omicron të koronavirusit, shfaq disa simptoma të tjera: “Përveç kollës apo temperaturës, ka edhe prekje të stomakut”. Instituti i Shëndetit Publik dërgoi pak ditë më parë në laboratorin e referencës në Gjermani disa mostra të dyshuara si të infektuara nga varianti BA2. Brenda kësaj jave pritet edhe përgjigjja për të konfirmuar nëse në territorin e vendit po qarkullon ky mutacion i ri.
