Kosovë, sot mbushet një vit nga votimi i Qeverisë Kurti II
Sot ( e martë, 22 mars 2022) bëhen 1 vit që kur u votua Qeveria Kurti II, e cila kishte disa prioritete si: menaxhimin e pandemisë, punësimin, arsimin drejtësinë etj.
Nga 120 deputetë sa ka Kuvendi i Kosovës, Qeveria Kurti II kishte marrë besimin e 67 deputetëve, ndërsa 30 deputetë kishin votuar kundër.
Kryeministri Albin Kurti, pati thënë se qeveria e tij do të ketë disa prioritete. Programi qeverisës është fokusohuar në masat për përballimin e pasojave që po lë pandemia, zhvillimin ekonomik të vendit, mbështetjen për bizneset, rritjen e pagës minimale, krijimin e vendeve të punës dhe riorganizimin të skemave sociale.
Prioriteti i parë sipas Qeverisë Kurti 2 ishte shëndeti në kushtet e pandemisë, ndërsa i dyti kishte të bënte me ekonominë po ashtu në kushtet e pandemisë., njofton RTK.
Kurti ka thënë se gjatë mandatit të qeverisë së tij do të ketë transparencë, profesionalizëm dhe llogaridhënie. Ndërsa pati premtuar reforma në drejtësi ku vettingu do të jetë fjala kryesore e kësaj reforme.
Po ashtu Kurti ka thënë se gjatë mandatit të tij qeverisës do të bëhen reforma në skemat sociale duke ofruar mbështetje për familje me të ardhura të vogla, shtesa për fëmijë e punësime për moshat e reja. Ai ka premtuar edhe ndërtimin e 160 çerdheve në gjithë vendin, mbështetje financiare për çiftet e reja dhe rritje të pagës minimale në 250 euro.
Kurti ka premtuar se gjatë këtyre katër vjetëve të qeverisjes, do të përmbyllet zhvillimi i sistemit informimin shëndetësor dhe do të fillohet me rritjen e fondit të sigurimeve shëndetësore.
Po ashtu, ka thënë ai, do ta përmbyllet reforma e administratës publike dhe do të zbatojë diversifikimin e burimeve të energjisë dhe asetet strategjike, duke garantuar edhe çmime të përballueshme për industritë dhe amvisëritë.
Kurti ka premtuar edhe qasje në ujë të pijshëm për ata qytetarë që nuk kanë dhe problemi i ujërave të zeza pas katër vjetëve qeverisej të jetë një problem i së kaluarës.
Ndërsa sa i përket mërgatës, Kurti ka pohuar se ajo do të jetë pjesë e zhvillimit ekonomik të vendit. Ai ka thënë se qeveria e tij do të krijojë grantin e katërt për komuna më qëllim që t’u mundësohet më shumë autonomi kryetarëve të komunave për investime në komunat e tyre.
Kurti ka bërë të ditur se gjatë mandatit qeverisës, Kosova do të aplikojë për anëtarësim në BE dhe për anëtarësim në Kartën e Adriatikut. Ai po ashtu ka thënë se qeveria e tij është duke përgatitur dosjen për të paditur Serbinë për gjenocid, teksa dialogun e ka renditur prioritet të katërt për qeverinë e tij.
Plani qeverisës parasheh edhe një pagë 6 mujore prej 250 eurove për lehonat e papuna. Plani për rimëkëmbje ekonomike të vendit do të fokusohet në disa pika kyçe, si rritja e fuqisë blerëse, prodhimi, eksporti dhe në politikat lehtësuese që to të ndërmerren nga qeveria për të mbështetur bizneset.
Ndryshe Qeveria Kurti I ishte votuar më 3 shkurt të vitit 2020, pas një koalicioni mes Lëvizjes Vetëvendosje dhe Lidhjes Demokratike të Kosovës (LDK).Qeveria e Kurti I është rrëzuar përmes një mocioni të mosbesimit më 25 mars 2020, të organizuar nga Lidhja Demokratike e Kosovës
